15 drejtues dhe ish-drejtues policie kanë kandiduar për të qenë në krye të uniformave blu, post i lënë vakant pas dorëheqjes së Muhamet Rrumbullakut.

Lista me emrat e të interesuarve është publikuar nga Ministria e Brendshme, pak orë pas mbylljes së afatit 7 ditor për dorëzimin e aplikimit për postin e rëndësishëm.

Mes emrave në garë, janë drejtues aktual të disa departamenteve në Policinë e Shtetit si dhe drejtor të disa prej drejtorive vendore në qarqe.

Me shpalljen e listës zyrtare të kandidatëve për Drejtor të Përgjithshëm, tashmë procesi hyn në një tjetër fazë, atë të vlerësimit të secilit prej garuesve nga komisioni i posaçëm, i krijuar nga ministri i Brendshëm.

Ky proces duhet të përfundojë brenda 10 ditëve dhe në fund komisioni, në përbërje të së cilit janë 3 anëtarë pritet të bëjë vlerësimin me pikë të secilit prej kandidatëve në garë.

Më pas emri i njërit prej kandidatëve i klasifikuar mes më të mirëve, do të përzgjidhet nga ministri i Brendshëm, Ervin Hoxha brenda 48 orëve për t’iu propozuar kryeministrit.

Lista me kandidatët për Drejtor të Përgjithshëm të Policisë së Shtetit

  • Adriatik Tafçiu – Shef sektori, Policia e Shtetit
  • Altin Mena – Zv/drejtor policie në Lezhë
  • Ardian Çipa – Drejtor Policie në Gjirokastër
  • Gentjan Shehaj – Drejtor i Kurrikulave në Akademinë e Sigurisë
  • Hajrulla Xhivini – Ish-drejtues policie
  • Ibrahim Disha – Ish-drejtues policie
  • Idajet Faskaj – Drejtor i Interpol Tirana
  • Ilir Proda – Drejtor Policie në Elbasan
  • Lutfi Minxhozi – Drejtor i Europol Tirana
  • Neritan Nallbati – Drejtor i Policisë Kriminale
  • Pëllumb Seferi – Drejtor i Marrëdhënieve Ndërkombëtare në Policinë e Shtetit
  • Rebani Jaupi – Drejtor për Rendin dhe Sigurinë në Policinë e Shtetit
  • Sami Rasha – Pedagog në Akademinë e Sigurisë
  • Shemsi Prençi – Ish-drejtues policie
  • Skënder Hita – Drejtor Policie në Durrës

Tv Klan