Një 34-vjeçar i akuzuar për mashtrim ra në prangat e policisë së Tiranës. Në një njoftim zyrtar për mediat, autoritetet thonë se arrestimi i tij erdhi pas disa denoncimeve, ku persona të ndryshëm deklaruan se u kishte marrë shuma të konsiderueshme parash nëpërmjet mashtrimit.

Një ditë më parë, policia i bëri shenjë të riut që të ndalonte, por ai nuk u bind, e në tentativë për t’i ikur policisë përfundoi në Lanë. Tashmë përveç akuzës së mashtrimit, 34-vjeçari përballet edhe me akuzën e kundërshtimit të policisë.

“Specialistët për Hetimin e Krimeve Ekonomiko-Financiare të DVP Tiranë në bashkëpunim me Komisariatin e Policisë Nr. 2, në vijim të punës për goditjen e paligjshmërive, pas kallëzimeve të marra se një shtetas përvetësonte shuma të konsiderueshme parash me anë të mashtrimit, menjëherë kanë organizuar punën për kapjen dhe vënien e tij përballë përgjegjësisë ligjore dhe kanë finalizuar operacionin policor të koduar “Përsëritësi”. Si rezultat i tij u ndalua shtetasi S. K., 34 vjeç, banues në Tiranë, për veprat penale “Mashtrimi” dhe “Kundërshtimi i punonjësit të policisë së rendit publik”, parashikuar nga nenet 143/2 dhe 236 të Kodit Penal.  

“Ky shtetas dyshohet se nëpërmjet mashtrimit ka përvetësuar shuma të ndryshme parash nga disa shtetas. Ditën e djeshme, shërbimet e Policisë i kanë bërë shenjë ndalimi por 34-vjeçari nuk është bindur ndaj urdhrave të tyre dhe ka devijuar rrugën duke rënë në lumin Lana”, thuhet në një njoftim të policisë së Tiranës./tvklan.al