Ky ishte një moment i rrezikshëm për Bashkimin Evropian, por e kapërcyem atë.

Kështu u shpreh kryeministri italian, Silvio Berlusconi, në përfundim të samitit të jashtëzakonshëm të Bashkimit Evropian për konfliktin në Kaukaz.

Megjithëse liderët e Bllokut 27 anëtarësh ishin të ndarë për vendosjen e sanksioneve kundër Rusisë ata u treguan të bashkuar në paralajmërimin që i dhanë Moskës se marrëdhëniet dypalëshe ndodheshin në udhëkryq.

Për kryeministrin Silvio Berlusconi dhe diplomacinë franceze, rreziku i vërtet qëndronte në vendosjen e sanksioneve në bazë të një versioni të fakteve që e sheh Moskën si fajtore përsa i përket Gjeorgjisë.

Mund të them, tha ai, se kemi evituar ripërsëritjen e Luftës së Ftohtë. Edhe më herët lideri italian shpjegoi arsyen e vërtet se pse Bashkimi Evropian nuk do të vendoste sanksione kundër Moskës.

Është shumë e rëndësishme edhe në interesin e përbashkët, tha ai, të kemi marrëdhënie të mira me Rusinë.

Moska, jo vetëm që është një fuqi e madhe ushtarake dhe bërthamore, por edhe një furnizues shumë i rëndësishëm i gazit dhe naftës për Evropën.

Pavarësisht këtij fakti më e ashpër ishte Britania e Madhe që bëri thirrje për pezullimin e një marrëveshje partneriteti me Moskën dhe i kërkoi BE-së që të rishikojë në mënyrë thelbësore marrëdhëniet me Rusinë.

Udhëheqësit e Bllokut shprehën përkrahjen për Gjeorgjinë duke aprovuar për dislokimin e  vëzhguesve të BE-së atje.

Ata dënuan njohjen që Rusia i bëri pavarësisë së dy rajoneve gjeorgjiane dhe u bëri thirrje dhe vendeve të tjera të mos ndjekin rrugën e saj.

Brukseli i kërkoi Rusisë të tërheqë trupat nga Gjeorgjia dhe për të verifikuar përmbushjen e armëpushimit presidenti francez, Nikolas Sarkozi, do të udhëtojnë në fund të javës drejt Moskës./tvklan.al

Gazetare: Urita Dokle