Euro 2024 Policia e Tiranës njoftoi mbrëmjen e kësaj të enjteje arrestimin e Valter Bamit, në lidhje me ngjarjen e rëndë të ndodhur mbrëmjen e 4 Qershorit në Larushkë të Fushë Krujës, ku mbeti i vrarë Ramazan Sino dhe u plagosën dy fëmijët e Gentjan Bejtjes.
Në një njoftim zyrtar për mediat, policia thotë se arrestimi i tij erdhi pas ekspertimi kimik, nga ku ka rezultuar se në dorën e majtë të 37-vjeçarit Bami, janë konstatuar faktorë plotësues të qitjes me armë zjarri. Ai është arrestuar me vendim gjykate për akuzën “Mbajtja pa leje dhe prodhimi i armëve, armëve shpërthyese dhe i municionit”.
“Në vijim të veprimeve hetimore në lidhje me ngjarjen e datës 03.07.2023, ku në fshatin Larushkë, Krujë, në oborrin e banesës së shtetasit Gentjan Bejtjas, është qëlluar me armë zjarri e si pasojë ka humbur jetën shtetasi Ramazan Sino. Rreth orës 04:00 të po kësaj date, është shoqëruar shtetasi Valter Bami, 37 vjeç, të cilit i janë marrë faktorët plotësues dhe deklarim në lidhje me ngjarjen e mësipërme e më pas është lënë i lirë, ju informojmë se: Sot me datë 06.07.2023, bazuar në përgjigjen e aktit të ekspertimit kimik, ka rezultuar se në dorën e majtë të shtetasit Valter Bami, janë konstatuar faktorë plotësues të qitjes me armë zjarri”.
“Mbi bazën e këtij akti ekspertimi, Prokuroria pranë Gjykatës së Shkallës së Parë të Juridiksionit të Përgjithshëm Tiranë ka lëshuar sot më datë 06.07.2023, urdhrin e ndalimit për këtë shtetas për veprën penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 i Kodit Penal. Po sot, rreth orës 20:30, në fshatin Greps, Nikël, është lokalizuar, kapur dhe shoqëruar në ambientet e DVP Tiranë shtetasi Valter Bami, 37 vjeç, banues në Nikël, Fushë Krujë. Ndërkohë vazhdojnë intensivisht hetimet për dokumentimin e plotë ligjor të ngjarjes së mësipërme”, thuhet në njoftimin e policisë së Tiranës.
Kujtojmë se pak pas mesnatës së 4 Korrikut, nga breshëria e plumbave në shtëpinë e Gentian Bejtjes, mbeti i vrarë kunati i tij Ramazan Sino dhe u plagosën dy djemtë e mitur të Bejtjes, 10 dhe 13 vjeç. 10-vjeçari ka lënë spitalin, ndërsa djali tjetër mbetet ende nën kujdesin e mjekëve.
Objektiv i atentatit dyshohet se ishte Gentian Bejtja, i cili kishte ardhur para dy javësh në Shqipëri. Ky informacion siç duket është siguruar nga kundërshtarët e tij, që organizuan vrasjen. Në atentat dyshohet se morën pjesë 3 persona, të cilët lëviznin me makinë. Pasi lëshuan breshëri plumbash në drejtim të shtëpisë së Bejtjes, mjetin e dogjën rreth 6 kilometra larg. Më pas dyshohet se autorët u ndihmuan nga persona të tjerë.
Për identifikimin e tyre, të martën policia e Fushë-Krujës ushtroi kontrolle në 3 banesa, si dhe shoqëroi 3 persona që mund të kishin dijeni për ngjarjen, Durim e Valter Bamin dhe Marklen Haklën. Pasi dhanë deklarimet për disa orë me radhë dhe veçmas njëri-tjetrit ata u lanë të lirë. Ata mohuan të kenë dijeni për atentatin, duke përjashtuar mundësinë se kanë konflikte me Gentian Bejtjen.
Valter Bami, së bashku me vëllain e tij Durim Bami janë emra të njohur për drejtësinë, ashtu sikurse Marklen Haka, i cili i shpëtoi një atentati me armë në 2019. Këta persona janë hetuar për disa ngjarje kriminale./tvklan.al
