Celibashi: Hiqen nga policia, ato s’përmbajnë shënimin e kërkuar
Të gjithë posterat e partive politike që nuk përmbajnë shënimin “Prodhuar në përgjegjësinë ligjore të x partie” do duhet të hiqen nga rrugët e 61 bashkive në vend. Vendimi u mor nga kryekomisioneri Ilirjan Celibashi, pasi u vlerësuan si të prodhuara në kundërshtim me ligjin.
Partitë politike do të duhet të raportojnë brenda orës 24:00 të së premtes nëse e kanë përmbushur këtë detyrim. Në të kundërtën, Policia Bashkiake dhe Policia e Shtetit do të zbresin në terren.
Nga një vëzhgim i ‘Klan News’, rezulton se disa postera elektoralë të Partisë Socialiste janë ndryshuar dhe përshtatur sipas kërkesës së KQZ, duke i shpëtuar heqjes nga policia.
Më herët, Komisioni Qëndror i Zgjedhjeve u dha 3 ditë afat subjekteve në garë që të vetkorrigjohen, gjë që opozita ende nuk e ka reflektuar pasi posterat e Belind Kellicit në rrugët e kryeqytetit vijojnë të jenë pa shënimin e kërkuar.
Klan News
