Euro 2024 Policia e Tiranës ka zbardhur shkakun e dhunimit të avokatit Sokol Mëngjesi.
Drejtori i Policisë së Tiranës, Tonin Vocaj, në një konferencë për shtyp, bëri të ditur se avokati u godit për shkak të detyrës.
Sipas tij, avokati ka përfaqësuar në një proces civil në Shkallë të Parë dhe në Apel një familje që kishte të trashëguar një pronë në Tiranë.
Proces i cili është fituar nga pala e përfaqësuar prej tij. Disa nga trashëgimtarët nuk kanë pranuar të plotësojnë kushtet ligjore të kontratës me studion ligjore.
Policia e Tiranës bëri të ditur se autorët e dhunës ndaj avokatit janë Elton Kasaj, Drivald Alia dhe Dorian Alia.
Ndërsa një person i katërt i quajtur Romario Tabaku ka ndihmuar autorët e dyshuar për t’i larguar nga vendngjarja me makinën Audi me targa AB696JT. Ndërsa si organizator, Policia e Tiranës dyshon të jetë Dritan Nano 58 vjeç të cilin e ka shoqëruar me iniciativë.
Vocaj u bëri thirrje qytetarëve që të japin informacione nëse kanë dijeni për vendndodhjen e autorëve të dyshuar.
Policia ka vënë në dispozicion 20 mijë Euro shpërblim.
Për këtë ngjarje, Policia e Tiranës e ka referuar dosjen në Prokurori për akuzën e vrasjes së funksionarëve publik të mbetur në tentativë.
Ndërkohë, teksa Tonin Vocaj ishte në konferencë shtypi, njëri nga autorët e dyshuar, Dorian Alia 32 vjeç u vetëdorëzua në Policinë e Tiranës.
I pyetur nga gazetarët, Tonin Vocaj bëri të ditur se përpara 1 muaji, ka patur një takim mes palëve, që pasoi me ngjarjen e ditës së sotme (e mërkurë 29 Maj 2024).
Avokati Sokol Mëngjesi u dhunua në orën 08:50 të mëngjes sapo la fëmijën në kopsht në zonën e ish-bllokut në rrugën “Pjetër Bogdani”.
Ai u godit me sende të forta nga 3 personat e sipërmendur.
Moszbatimi i kontratës me avokatin i njërit prej trashëgimtarëve
8 trashgimtarë të tokës kanë patur përfaqësues avokat Sokol Mëngjesin. Njëri nga 8 trashgimtarët, Dritan Nano nuk ka pranuar zbatojë kontratën pas fitimit të pronës. Në këtë situatë avokati ka kërkuar të respektohet kontrata që kishin lidhur. Vetëm Dritan Nano nuk e ka pranuar.
Avokati ka hapur gjyq ndaj Nanos për moszbatimin e kontratës që e ka fituar, dhe përmbarimi i ka bllokuar pronën duke mos e lejuar që të shitet. Në këtë situatë Nano ka angazhuar lidhjet e tij shoqërore duke kërcënuar avokatin që të tërhiqet nga përqindja që duhet të merrte. Takimi i parë ka qenë përpara një muaji por nuk kanë rënë dakord.
Deklarata e drejtorit të Policisë së Tiranës, Tonin Vocaj
Jam sot këtu për të bërë me dije opinionin publik për masat e marr nga ana e Policisë në lidhje me ngjarjen e rëndë të ndodhur ditën e sotme më datë 29.05.2024, rreth orës 08:50, ku në zonën e ish-Bllokut në Tiranë, në rrugën “Pjetër Bogdani”, tre persona kanë goditur me sende të forta shtetasin Sokol Mëngjesi, 45 vjeç, banues në Tiranë, me profesion avokat.
I dëmtuari është dërguar menjëherë në spital për dhënien e ndihmës mjekësore dhe ndodhet nën kujdesin e mjekëve.
Menjëherë pas marrjes së njoftimit, shërbimet e Komisariatit të Policisë Nr. 2 dhe Sektori për Hetimin e Krimeve të Rënda, në Drejtorinë Vendore të Policisë Tiranë, organizuan punën policore për marrjen e informacionit mbi autorët e mundshëm të kësaj ngjarjeje.
Ku nga tërësia e veprimeve gjurmuese dhe precedurale, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, është bërë i mundur identifikimi i autorëve të dyshuar të kësaj ngjarjeje kriminale, konkretisht shtetasve.
Emrat e autorëve të plagosjes së Sokol Mëngjesit
- Dorian Beqir Alia, 32 vjeç, banues në Tiranë, i cili është vetëdorëzuar në Polici;
- Drivald Sokol Alia, 21 vjeç, banues në Tiranë;
- Elton Ndue Kasaj, 33 vjeç, banues në Tiranë;
- Romario Roberto Tabaku, 26 vjeç, banues në Tiranë. (i cili ka larguar autorët nga vendi i ngjarjes me automjetin tip Audi me targë AB 696 JT).
Nga veprimet hetimore rezulton se i dëmtuari Sokol Mëngjesi me profesion avokat, është goditur për shkak të dëtyrës.
Po nga veprimet hetimore rezulton se avokati ka përfaqësuar ligjërisht në një proces civil në shkallë të parë dhe në apel një familje e cila kishte të trashëguar një pronë në qytetin e Tiranës.
Proces i cili është fituar nga pala e përfaqësuar prej tij. Disa nga trashëgimtarët nuk kanë pranuar të plotësojnë kushtet ligjore të kontratës së nënshkruar me Studion Ligjore “ALTERUM SHPK”.
Po në vijim të veprimeve hetimore dhe procedurale është shoqëruar shtetasi Dritan Jani Nano, 58 vjeç, banues në Tiranë.
Ky shtetas u ndalua me iniciativë i dyshurar si organizator i kësaj ngjarjeje të rëndë kriminale.
Materialet do ti kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Për veprën penale “Vrasja e funksionarëve publik”, mbetur në tentativë, parashikuar nga nenet 79/a dhe 22 të Kodit penal.
“20 mijë euro shpërblim kush jep informacion për kapjen e autorëve të plagosjes së Sokol Mëngjesit”
Ndërkohë Drejtoria Vendore e Policisë Tiranë, e mbështetur nga Drejtoria e Përgjithshme e Policisë së Shtetit, Forcat Speciale RENEA, Forcat Kombëtare të Sigurisë, vazhdojnë operacionin për kërkimin, lokalizimin dhe kapjen e personave të shpallur në kërkim.
Drejtoria Vendore e Policisë Tiranë, kërkon ndihmën e publikut për lokalizimin dhe kapjen e autorëve.
Për çdo informacion të vlefshëm që do të çojë në kapjen e autorëve vë në dispozicion shumën prej 20 000 Euro.
Informacioni mund të jepet në numrin telefonik pa pagesë 112 si dhe në numrin celular +355694111546
(Informacioni mund të jepet në telefon ose WhatsApp).
/tvklan.al
