Euro 2024 
Ky që shihni në foto është Gerald Shehu. 43-vjeçari dyshohet se pak pas mesnatës së kësaj të enjteje qëlloi me armë 31-vjeçarin Eraldo Nevruzi. Ngjarja ndodhi në një hotel në Dhërmi, aty ku i riu nga Tirana punonte si recepsionist.
Gazetari Besar Bajraktaraj, i cili ka siguruar edhe foton në fjalë, sjell detaje të reja rreth ngjarjes e cila u raportua pak më herët e që për momentin është e mbuluar me mister.
Kështu, sipas gazetarit, Shehu dhe Nevruzi kanë qenë miq me njëri-tjetrin. Ata mësohet se kishin jetuar në Angli dhe kohët e fundit ishin kthyer në vendlindje për të hapur biznes së bashku.
Por përse policia dyshon se 31-vjeçari Nevruzi është vrarë, në një kohë kur trupi i tij nuk është gjetur ende?
Paraprakisht, raportohet se ngjarja ka ndodhur në një prej dhomave të hotelit. Policia dyshon se bëhet fjalë për vrasje për shkak të dëshmive në vendin e ngjarjes që thonë se janë dëgjuar dy të shtëna.
Po ashtu gjurmët e gjakut në vendin e ngjarjes shtojnë edhe më shumë dyshimet se recepsionisti është ekzekutuar.
Autoritetet mësohet se kanë në dorë edhe pamjet filmike, por të paktën deri më tani nuk rezulton të jetë zbuluar mënyra sesi është larguar 31-vjeçari nga hoteli.
Në lidhje me ngjarjen, mësohet se janë marrë në pyetje të paktën 29 persona. Pas ngjarjes, 43-vjeçari Gerald Shehu u largua drejt Greqisë. Ai u ndalua nga autoritetet fqinje gjatë orëve të pasdites në aeroportin e Korfuzit, teksa po tentonte të largohej drejt Anglisë.
Ndërsa makina e tij u gjet në Sarandë.
Po sipas gazetarit Bajraktaraj, hoteli në fjalë mësohet se është në pronësi të një gruaje, G. Nino, ndërsa autori i dyshuar është dhëndri i saj dhe njëkohësisht bashkëpronar.
Motivet e kësaj ngjarjeje mbeten momentalisht mister. Dyshimet janë se ajo mund të ketë ardhur si pasojë e konflikteve që lidheshin me biznesin, pra hotelin ku ndodhi dhe ngjarja./tvklan.al
