Lajme Arkiva 2003

Bruceloza godet jugun e Shqipërisë. Temperaturat e larta janë bërë shkak për rritjen e numrit të personave të prekur nga sëmundjet e brucelozës. Vetëm muajin e fundit sipas të dhënave të Institutit të Shëndetit Publik janë shënuar 43 raste të prekur nga kjo sëmundje, kryesisht të përqendruar në jug të vendit.

“Sëmundjet zonatike po bëhen gjithnjë e më shumë shqetësuese për shërbim veterinar dhe atë human kur për shkaqe të shumta vitet e fundit ato kanë pësuar një rritje të dukshme dhe veçanërisht infeksioni i brucelozës. Në krahasim me vitin e kaluar numri i rasteve me  brucelozë ka pësuar rritje. Incidencën më të lartë e kam patur rrethet e jugut ku atje infeksioni është më i pranishëm siç janë Korça, Delvina, Gjirokastra, por gjithashtu ka pësuar një rritje të dukshëm edhe në rrethe të cilët më parë kanë pasur një incidencë më të ulët”.

Bruceloza është një sëmundje ngjitëse që te njeriu transmetohet nga kafshët. Konsumimi i qumështit nga kafshët e prekura nga sëmundja shkakton te njerëzit simptoma të tilla si temperature 38 gradë, djersitje, dhimbje kyçesh dhe debulesë të përgjithshme. Burime nga Ministria e Shëndetësisë thonë se janë marrë masa për vaksinimin e kafshëve që mbartin virusin, por mësohet se numri i tyre është tepër i madh./tvklan.al