Partia Demokratike shprehu ngushëllimet e saj për ndarjen nga jeta të Luan Hajdaragës, te cilin e konsideroi një protagonist të zhvillimeve të së majtës shqiptare gjatë 28 viteve të fundit.

Ne mesazhin e Partisë Demokratike, thuhet se “Profesori i njohur i psikologjisë dha kontribut në normalizimin e jetës politike në vend dhe në zbatimin e një diplomacie pa ndikime partiake”. PD kujton edhe rolin aktiv të Hajdarages në krizën e të shpërngulurve shqiptarë gjatë luftës së Kosovës.

Mesazhi i plotë i PD:

“Partia Demokratike shpreh ngushëllimet e saj më të thella për ndarjen nga jeta të Luan Hajdaragës, protagonist i zhvillimeve të së majtës shqiptare gjatë 28 viteve të fundit.

Hajdaraga ishte një kontribues i jetës politike pluraliste në Shqipëri dhe luajti një rol të rëndësishëm në formësimin e një të majte shqiptare, që mbështeste alternativën euroatlantiste.

Si nënkryetar i PS dhe më pas si Ministër i Mbrojtjes apo zëvendësministër i jashtëm, Profesori i njohur i psikologjisë dha kontribut në normalizimin e jetës politike në vend, në zbatimin e një diplomacie pa ndikime partiake dhe mori pjesë aktive në aksionin mbarëkombëtar për zgjidhjen e krizës së të shpërngulurve shqiptarë të Kosovës.

 Me ndarjen e tij nga jeta, familja humbi njeriun e saj më të shtrenjtë, Partia Socialiste njërin nga ithtarët e evropianizimit të saj, kurse Partia Demokratike një kundërshtar të denjë politik.”

/tvklan.al